პრო ბონო პროგრამებისათვის ყველაზე მნიშვნელოვან რესურსს პროფესიული სერვისების მიმწოდებელი კომპანიები წარმოადგენს (საკონსულტაციო კომპანიები, დიზაინის სფეროში მომუშავე კომპანიები და ა. შ.), თუმცა სხვა სექტორებიც სულ უფრო ქმედითად ითვისებენ ამ ტენდენციას. ბოლო წლებში ახალი ტექნოლოგიების სფეროში მოღვაწე კომპანიებმაც აქტიურად აიტაცეს პრო ბონო. მაგალითად, პრო ბონო სოციალური პროგრამების ერთ-ერთ პრიორიტეტულ მიმართულებას წარმოადგენს LinkedIn-ის, BMW-ს კორპორატიული ფონდის, Google-ისათვის.

ასევე ჩამოყალიბდა ორგანიზაციები, რომლებიც ხელს უწყობენ მსოფლიოში პრო ბონო პრაქტიკის დამკვიდრებას და ერთმანეთთან აკავშირებენ პრო ბონო კომპანიებსა და ბენეფიციარ ორგანიზაციებს.

მიუხედავად იმისა, რომ სწრაფად იზრდება პრო ბონო სერვისების მიმწოდებელი კომპანიების რიცხვი, სამოქალაქო ორგანიზაციების საჭიროებები მაინც აღემატება მიწოდების მასშტაბს.

ციფრები და ფაქტები

• 92 % დასაქმებული ამერიკელებისა მიიჩნევს, რომ პროფესიული მოხალისეობის პროგრამები აუმჯობესებს პროფესიულ უნარებს, კომუნიკაციის და კლიენტებთან ურთიერთობის უნარებს და წვლილი შეაქვს ლიდერობის უნარების განვითარებაში.
• 82 % დამსაქმებლებისა ფიქრობს, რომ კადრების შერჩევის პროცესში უპირატესობას მიანიჭებს იმ კანდიდატებს, რომლებსაც აქვთ მოხალისეობის გამოცდილება.

წყარო: 2016 Deloitte Impact Survey, Building Leadership Skilss Through Volunteerism